سیب غذائیت سے بھرپور پھل ہے۔ اس میں وٹامن سی کی وافر مقدار پائی جاتی ہے۔ اس کے اندر مختلف اینٹی آکسیڈنٹس بھی موجود ہیں جو جسم میں انفیکشنز کو ختم کرتے ہیں۔ اس کے علاوہ اس میں پائے جانے والے دیگر اجزاء میں کیلشیم، فاسفورس، فلورائیڈ اور پوٹاشیم شامل ہیں۔ طبی لحاظ سے سیب کے فوائد یہ ہیں:
طبیعت میں تازگی
سیب دماغی صحت کو بہتر بناتا ہے۔ اسے کھانے سے انسان تر و تازہ اور ہشاش بشاش رہتا ہے۔ جسمانی اور دماغی کمزوری کے شکار افراد کے لیے یہ پھل اکسیر کی حیثیت رکھتا ہے۔
دل، جگر اور پتے کے لیے مفید
سیب کے باقاعدہ استعمال سے معدہ اور جگر فعال ہوتے ہیں۔ اس میں فائبر کی زیادہ مقدار ہوتی ہے جو جگر کے مریضوں کے لیے بہت مفید ہے۔ سبز رنگ کا سیب کھانے سے پتے میں پتھری بننے کے امکانات کم ہو جاتے ہیں۔ سیب میں پوٹاشیم بھی پایا جاتا ہے جو دل کی دھڑکن کو متوازن اور بلڈ پریشر کو قابو میں رکھتا ہے۔
چہرے کی چمک
سیب میں موجود اینٹی آکسیڈنٹس چہرے کو چمکدار بناتے ہیں۔ یہ قبل از وقت جھریوں سے بھی بچنے میں بھی مدد دیتے ہیں۔
موٹاپے سے نجات
ہلکی پھلکی بھوک میں سنیکس کے بجائے سیب کھا لیا جائے تو یہ معدے کو بھرا رکھتا ہے۔ ایسے میں کم کھانا کھایا جاتا ہے۔ موٹاپے سے پریشان افراد ناشتے اور لنچ کے درمیان ایک سیب اور لنچ اور ڈنر کے درمیان ایک سیب کھائیں تو اس سے ان کا وزن کم ہوگا۔
آئرن کی کمی دور کرے
سیب میں آئرن کی مقدار کم ہوتی ہے۔ اس کے باوجود خون کی کمی کے شکار افراد کو ڈاکٹرحضرات سیب کھانے کا مشورہ دیتے ہیں۔ اس کا سبب یہ ہے کہ اس میں موجود وٹامن سی آئرن کو جذب ہونے میں مدد دیتا ہے۔ اس سے جسم میں آئرن کی کمی کو پورا کیا جا سکتا ہے۔
ہڈیوں کے لیے مفید
خواتین میں ہڈیوں کی کمزوری، ان کا بھربھراپن اور دیگر مسائل زیادہ پائے جاتے ہیں۔ انہیں زیادہ سیب کھانے چاہئیں کیونکہ اس میں موجود فلورائیڈ ہڈیوں میں کیلشیم بنانے میں مددگار ثابت ہوتا ہے۔
مسوڑھے اور دانت بنائے مضبوط
سیب کے گودے میں ایسے جراثیم کش اجزاء ہوتے ہیں جو دانتوں کی بیماریوں سے محفوظ رکھتے ہیں۔ اس کے علاوہ اس میں موجود کیلشیم کی وجہ سے دانت اور مسوڑھے مضبوط رہتے ہیں۔
جوڑوں کے لیے جادووئی دوا
جوڑوں کے مریضوں کے لیے سیب ایک جادووئی دوا کی حیثیت رکھتا ہے۔ اس میں فاسفورس کی زیادہ مقدار ہوتی ہے جو جوڑوں کو فعال رکھنے اور درد کو دور کرنے میں مفید ہے۔
