شفا انٹرنیشنل ہسپتال نے صحت کے شعبے میں ایک بڑا سنگ میل عبور کرتے ہوئے ایک ساتھ دو کلینیکل کیئر پروگرامز کے لیے بین الاقوامی سرٹیفیکیشن حاصل کر لی ہے۔ ہسپتال کو ایکیوٹ اسکیمک سٹروک (اچانک دماغ کی شریان بند ہونے کی کیفیت) اور ایکیوٹ کورونری سنڈروم (دل کی شریانوں کی اچانک بندش سے پیدا ہونے والی ہنگامی صورت حال) کے کلینیکل کیئر پروگرامز کے لیے جوائنٹ کمیشن انٹرنیشنل کی سرٹیفکیشن حاصل ہوئی ہے۔
ادارے کے مطابق یہ سرٹیفیکیشن اس بات کی تصدیق کرتی ہے کہ ہسپتال کا علاج، ہنگامی ریسپانس، مریضوں کی دیکھ بھال اور بحالی کا پورا نظام بین الاقوامی معیار کے مطابق ہے۔ تفصیلی جائزے کے دوران جوائنٹ کمیشن انٹرنیشنل نے ہسپتال کے ایمرجنسی سسٹم، علاج کے طریقہ کار، نگہداشت کے اصولوں اور بحالی کے تمام مراحل کو عالمی معیار کے مطابق قرار دیا۔
یاد رہے کہ اس سے قبل بھی شفا انٹرنیشنل ہسپتال کو اسی ادارے کی اکیڈمک میڈیکل سینٹر ایکریڈیشن حاصل ہو چکی ہے، جو دنیا کے 70 سے بھی کم طبی اداروں کو حاصل ہے۔
