حمل ایک انڈے کے بارآور ہونے سے شروع ہوتا ہے جو رحم کی اندرونی جھلی سے جڑ جاتا ہے۔ ایکٹوپک حمل (Ectopic pregnancy) اس وقت ہوتا ہے جب بارآور انڈا رحم کی مرکزی کیوٹی کے باہر جڑ جائے اور وہیں بڑھنے لگے۔
زیادہ تر ایکٹوپک حمل فیلوپین ٹیوب میں ہوتا ہے، جو انڈے کو بیضہ دانی سے رحم تک پہنچاتی ہے۔ اس قسم کو ٹیوبل حمل کہا جاتا ہے۔ بعض اوقات یہ حمل بیضہ دانی، پیٹ کی کیوٹی یا رحم کے نچلے حصے یعنی سروکس میں بھی ہو سکتا ہے۔
ایکٹوپک حمل معمول کے مطابق جاری نہیں رہ سکتا، اور بارآور انڈا زندہ نہیں رہ پاتا۔ اگر بروقت علاج نہ کیا جائے تو بڑھنے والا ٹشو اندرونی خون بہنے کا سبب بن سکتا ہے، جو جان لیوا بھی ثابت ہو سکتا ہے۔
علامات
ابتدا میں اکثر اوقات کوئی واضح علامت ظاہر نہیں ہوتی، تاہم بعض خواتین میں حمل کی ابتدائی علامات نظر آ سکتی ہیں۔ ان میں ماہواری رک جانا، چھاتی میں حساسیت اور متلی شامل ہیں۔ جیسے جیسے بارآور انڈا غلط جگہ پر بڑھتا ہے، علامات واضح ہوتی جاتی ہیں۔
اگر حمل کا ٹیسٹ کیا جائے تو نتیجہ مثبت آ سکتا ہے، تاہم ایکٹوپک حمل عام حمل کی طرح جاری نہیں رہ سکتا۔
ابتدائی علامات
٭ وجائنا میں ہلکا خون بہنا اور پیڑو میں درد
٭ فیلوپین ٹیوب سے خون رسنے پر کندھے میں درد
٭ بعض خواتین کو بار بار پاخانہ کرنے کی خواہش محسوس ہونا
٭ علامات اس بات پر منحصر ہوتی ہیں کہ خون کہاں جمع ہو رہا ہے اور کون سی اعصاب متاثر ہو رہی ہیں
ہنگامی علامات
اگر بارآور انڈا فیلوپین ٹیوب میں بڑھتا رہے تو ٹیوب پھٹ سکتی ہے۔ اس صورت میں پیٹ کے اندر شدید خون بہنے کا خطرہ ہوتا ہے۔ اس جان لیوا حالت کی علامات میں شدید چکر آنا، بے ہوشی اور شاک شامل ہیں۔
وجوہات
ٹیوبل حمل ایکٹوپک حمل کی سب سے عام قسم ہے۔ یہ اس وقت ہوتا ہے جب بارآور انڈا رحم تک پہنچنے کے راستے میں پھنس جائے۔ ایسا اکثر فیلوپین ٹیوب کی سوزش یا غیر معمولی ساخت کی وجہ سے ہوتا ہے۔ ہارمونز کا عدم توازن اور بارآور انڈے کی غیر معمولی نشوونما بھی اس مسئلے کا سبب بن سکتی ہے۔
خطرے کے عوامل
پہلے ایکٹوپک حمل ہونا: اگر پہلے ایسا حمل ہو چکا ہو تو دوبارہ ہونے کا امکان زیادہ ہوتا ہے
سوزش یا انفیکشن: جنسی طور پر منتقل ہونے والے انفیکشن فیلوپین ٹیوبز اور قریبی اعضا میں سوزش پیدا کر سکتے ہیں، جس سے خطرہ بڑھ جاتا ہے
بانجھ پن کا علاج: آئی وی ایف یا اسی طرح کے علاج لینے والی خواتین میں خطرہ بڑھ سکتا ہے، اور خود بانجھ پن بھی اس کے امکانات بڑھاتا ہے
فیلوپین ٹیوب کی سرجری: بند یا خراب ٹیوب کو درست کرنے کے بعد بھی خطرہ بڑھ سکتا ہے
مانع حمل طریقے: آئی یو ڈی استعمال کے دوران حمل کا امکان کم ہوتا ہے، مگر اگر ہو جائے تو ایکٹوپک ہونے کا خطرہ زیادہ ہوتا ہے، اور ٹیوب بند کرنے کا مستقل طریقہ بھی بعد میں حمل ہونے پر خطرہ بڑھاتا ہے
سگریٹ نوشی: حمل سے پہلے سگریٹ پینا خطرے کو بڑھا سکتا ہے
پیچیدگیاں
ایکٹوپک حمل فیلوپین ٹیوب کے پھٹنے کا سبب بن سکتا ہے۔ اگر بروقت علاج نہ کیا جائے تو پھٹی ہوئی ٹیوب جان لیوا اندرونی خون بہنے کا باعث بن سکتی ہے۔
ڈاکٹر سے کب رجوع کریں
اگر درج ذیل علامات محسوس ہوں تو فوری طبی امداد حاصل کریں:
٭ پیٹ یا پیڑو کا شدید درد اور ساتھ وجائنا سے خون بہنا
٭ شدید چکر آنا یا بے ہوش ہو جانا
٭ کندھے میں درد
تشخیص
پیڑو کا معائنہ ڈاکٹر کو درد، حساسیت یا سوجن کی نشاندہی میں مدد دیتا ہے اور فیلوپین ٹیوب یا بیضہ دانی میں کسی غیر معمولی گلٹی کا اندازہ لگاتا ہے۔
تاہم صرف جسمانی معائنہ سے ایکٹوپک حمل کی حتمی تشخیص ممکن نہیں، اس کے لیے خون کے ٹیسٹ اور الٹراساؤنڈ ضروری ہیں۔
حمل کا ٹیسٹ: HCG بلڈ ٹیسٹ سے حاملہ ہونے کی تصدیق ہوتی ہے
الٹراساؤنڈ: ٹرانس وجائنل الٹراساؤنڈ سے ڈاکٹر حمل کی درست جگہ دیکھ سکتے ہیں
دیگر خون کے ٹیسٹ: مکمل خون کا تجزیہ خون کی کمی یا نقصان کے آثار معلوم کرنے کے لیے کیا جاتا ہے، اور ضرورت پر خون کے گروپ کی جانچ بھی کی جاتی ہے
علاج
٭ علاج علامات کی شدت اور تشخیص کے وقت پر منحصر ہوتا ہے، اور یہ دوا، لیپروسکوپک سرجری یا پیٹ کی سرجری کے ذریعے کیا جا سکتا ہے
٭ کچھ صورتوں میں فیلوپین ٹیوب کو بچایا جا سکتا ہے، تاہم زیادہ تر میں پھٹی ہوئی ٹیوب کو نکالنا ضروری ہوتا ہے
٭ شدید خون بہنے کی صورت میں فوری سرجری لازمی ہوتی ہے، جو لیپروسکوپی یا پیٹ میں چیرا لگا کر کی جا سکتی ہے
احتیاطی تدابیر
اگرچہ ایکٹوپک حمل کو مکمل طور پر روکنا ممکن نہیں، درج ذیل اقدامات خطرہ کم کرنے میں مددگار ہیں:
٭ سیکس پارٹنرز کی تعداد محدود رکھیں اور ازدواجی تعلق کے دوران کنڈوم استعمال کریں
٭ سگریٹ نوشی ترک کر دیں، خصوصاً حمل کی کوشش سے پہلے
نوٹ: یہ مضمون صرف معلومات کے لیے ہے۔ صحت کے مسائل پر ہمیشہ اپنے معالج سے رجوع کریں۔
