ڈینڈرف

ڈینڈرف (Dandruff) ایسی حالت ہے جس میں سر کی جلد سے خشک جلد کے چھوٹے ٹکڑے جھڑتے ہیں۔ یہ متعدی یا نقصان دہ نہیں ہوتی، تاہم شرمندگی کا باعث بن سکتی ہے۔

ہلکے ڈینڈرف کو نرم اور باقاعدہ شیمپو کے استعمال سے ٹھیک کیا جاسکتا ہے۔ اگر اس سے فائدہ نہ ہو تو میڈیکیٹڈ شیمپو استعمال کرنا پڑ سکتا ہے۔ علاج کے باوجود علامات دوبارہ ظاہر ہوسکتی ہیں، تاہم زیادہ تر لوگ علامات کو کنٹرول کر سکتے ہیں۔

علامات

ڈینڈرف کی نمایاں علامات میں شامل ہیں:

٭ سر، بالوں، بھنوؤں یا کندھوں پر جلد کے سفید ذرات

٭ سر کی جلد میں خارش

٭ شیر خوار بچوں میں سر کی کھردری اور جمی ہوئی جلد

٭ ذہنی دباؤ کے دوران یا سرد اور خشک موسم میں ڈینڈرف بڑھ سکتا ہے

ڈاکٹر سے کب رجوع کریں

عام طور پر علاج کی ضرورت نہیں ہوتی۔ اگر ڈینڈرف شیمپو سے بھی بہتری نہ آئے تو ڈاکٹر سے رجوع کریں۔

وجوہات

ڈینڈرف کی کئی وجوہات ہوسکتی ہیں، جن میں شامل ہیں:

٭ خارش والی یا زیادہ چکنی جلد

٭ خشک جلد

٭ فنگس کی ایک قسم، جو زیادہ تر بالغ افراد کی سر کی جلد پر رہتی ہے۔ یہ قدرتی تیل سے غذا لیتی ہے

٭ بالوں کی دیکھ بھال سے متعلق مصنوعات سے حساسیت

٭ دیگر جلدی بیماریاں، جیسے سورائسس اور ایگزیما

خطرے کے عوامل

چند عوامل اس کے خطرے کو بڑھا سکتے ہیں:

عمر: ڈینڈرف اکثر جوانی کے آغاز میں شروع ہوتی ہے اور درمیانی عمر تک رہ سکتی ہے۔ تاہم بڑی عمر کے افراد میں بھی ہوسکتی ہے۔ بعض لوگوں میں یہ کبھی ختم نہیں ہوتی

جنس: مردوں میں ڈینڈرف زیادہ عام ہے

کچھ بیماریاں: اعصابی نظام کو متاثر کرنے والی بیماریاں، جیسے پارکنسن کی بیماری، ایچ آئی وی یا کمزور قوت مدافعت

تشخیص

ڈرماٹالوجسٹ صرف بالوں اور سر کی جلد کو دیکھ کر ڈینڈرف کی تشخیص کر لیتا ہے۔

علاج

٭ عام طور پر ہلکے ڈینڈرف کا علاج گھر پر کیا جاسکتا ہے

٭ پہلے اپنے بال نرم شیمپو سے زیادہ باقاعدگی سے دھونا شروع کریں۔ اس سے سر کی جلد سے اضافی تیل اور مردہ جلد صاف ہوجاتی ہے۔ اگر اس سے فائدہ نہ ہو تو میڈیکیٹڈ ڈینڈرف شیمپو آزمائیں۔

٭ اکثر لوگ ہفتے میں 2 سے 3 بار میڈیکیٹڈ شیمپو استعمال کرسکتے ہیں۔ اگر آپ کے بال گھنگریالے یا خاص ساخت والے ہیں تو اسے کم استعمال کرنا بہتر ہے

٭ اگر کسی شیمپو سے خارش، جلن یا چبھن ہو تو اسے استعمال کرنا بند کردیں۔ اگر کسی پراڈکٹ سے الرجی ہو جائے تو بلاتاخیر طبی مدد حاصل کریں۔

٭ ہر شیمپو کی بوتل پر دی گئی ہدایات ضرور پڑھیں اور ان پر عمل کریں

٭اگر ایک شیمپو فائدہ نہ دے تو مختلف اجزاء والا دوسرا شیمپو آزمائیں

٭ جب ڈینڈرف کم ہوجائے تو ڈینڈرف شیمپو کم استعمال کیا جاسکتا ہے۔ تاہم ڈینڈرف کو واپس آنے سے روکنے کے لیے اسے ہفتے میں کم از کم ایک بار استعمال کرتے رہنا مفید ہوسکتا ہے

٭ اگر چند ہفتے ڈینڈرف شیمپو استعمال کرنے کے باوجود فائدہ نہ ہو تو ماہر امراض جلد کے ماہر سے رجوع کریں

نوٹ: یہ مضمون قارئین کی معلومات کے لیے شائع کیا گیا ہے۔ صحت سے متعلق امور میں اپنے معالج کے مشورے پر عمل کریں۔