سن ہونا کیا ہے؟

طبی اصطلاح میں سن ہونا (numbness)جسم کے کسی حصے میں احساس ختم ہونے کو کہتے ہیں۔ اس میں جلن، سنسناہٹ یا سوئیاں چبھنے جیسا احساس بھی شامل ہے۔ یہ اثر کسی ایک حصے یا جسم کے دونوں اطراف کو متاثر کر سکتا ہے۔ اکثر لوگ جسمانی کمزوری کو بھی غلطی سے سن ہونا سمجھ لیتے ہیں۔ طبی طور پر یہ دونوں مختلف علامات اور کیفیات ہیں۔

وجوہات

اعصاب پر دباؤ، سوزش یا زخم سن ہونے کی بنیادی وجہ بنتا ہے۔ اس سے ایک رگ یا اعصاب کا پورا نیٹ ورک متاثر ہو سکتا ہے۔ ریڑھ کی ہڈی کے مہروں کا دبنا اس کی عام مثال ہے۔ کلائی کے اعصاب کی تکلیف بھی ہاتھ سن ہونے کا باعث بنتی ہے۔ ذیابیطس اور الکحل ان حساس اعصابی ریشوں کو مستقل نقصان پہنچاتے ہیں۔

عام طور پر یہ کیفیت دماغ سے باہر کے اعصابی نظام کو متاثر کرتی ہے۔ اس سے ہاتھ، پیر، بازو اور ٹانگیں زیادہ متاثر ہوتی ہیں۔ محض سن ہونا یا ہلکا درد عموماً جان لیوا نہیں ہوتا، تاہم یہ سٹروک یا دماغی رسولی کا پیش خیمہ بھی ہو سکتا ہے۔ ڈاکٹر علامات اور ٹیسٹوں کی مدد سے اصل وجہ کا تعین کرتے ہیں۔ تشخیص کے بعد ہی علاج کا حتمی فیصلہ کیا جاتا ہے۔

امراض

اس کی ممکنہ وجوہات درج ذیل ہیں:

٭ دماغ اور اعصابی نظام

٭ سماعت کے اعصاب یا دماغ کی رسولی (ٹیومر)

٭ برین اینیوریزم اور رگوں کی پیدائشی خرابی

٭ مدافعتی نظام کا اعصاب پر حملہ (گیلین بارے سنڈروم)

٭ مہروں کا کھسکنا اور ریڑھ کی ہڈی کی چوٹ

٭ پیریفرل نیوروپیتھی اور عارضی فالج  (TIA)

٭ حرام مغز کی سوزش

چوٹیں اور دیگر عوامل

٭ کندھے کے اعصاب کی چوٹ اور کارپل ٹنل سنڈروم

٭ شدید سردی سے ٹشوز کا مردہ ہونا (فروسٹ بائٹ)

٭ ذیابیطس

٭ الکحل کا بکثرت استعمال

٭ ملٹی پل سکلیروسیس

٭ متعدی بیماریاں (لیپروسی، شنگلز)

٭ کیموتھیراپی یا مخصوص ادویات کے مضر اثرات

٭ وٹامن بی-12 کی شدید کمی

٭ رگوں کی سوزش

ڈاکٹر سے کب رجوع کریں؟

سن ہونے کی وجوہات بے ضرر بھی ہو سکتی ہیں اور خطرناک بھی۔ کچھ صورتوں میں معالج سے فوری اور کچھ میں عمومی رابطہ ضروری ہوتا ہے۔

فوری ہنگامی رابطہ

اگر سن ہونا اچانک شروع ہو تو فوراً ایمرجنسی رجوع کریں۔ سر کی چوٹ کے بعد بے حسی کو معمولی نہ سمجھیں۔ درج ذیل علامات کی صورت میں بلا تاخیر ڈاکٹر سے ملیں:

٭ جسمانی فالج یا شدید کمزوری محسوس ہونا

٭ ذہنی الجھن اور بولنے میں دشواری ہونا۔

٭ چکر آنا یا اچانک شدید سر درد ہونا۔

٭ ڈاکٹر کی ہدایت پر سی ٹی اسکین یا ایم آر آئی کروائیں۔

عمومی طبی مشورہ

اگر کیفیت آہستہ آہستہ بگڑ رہی ہو تو ڈاکٹر کو دکھائیں۔ جسم کے دونوں اطراف میں بے حسی پر توجہ دیں۔ بار بار سن ہونے یا انگلیوں تک محدود ہونے پر مشورہ لیں۔

نوٹ: یہ مضمون قارئین کی معلومات کے لیے شائع کیا گیا ہے۔ صحت سے متعلق امور میں اپنے معالج کے مشورے پر عمل کریں۔