جس طرح آم کو پھلوں کا بادشاہ کہتے ہیں، اسی طرح لیچی کو پھلوں کی رانی کہا جاتا ہے۔ یہ بیضوی شکل کی ہوتی ہے۔ اس کے باہر کی طرف ایک پتلا اور سخت سرخ گلابی چھلکا ہوتا ہے۔ اس کے اندر ایک جھلی ہوتی ہے جس میں لیچی کا سفید گودا بڑے سے بیج کے ساتھ لپٹا ہوتا ہے۔
لیچی کے درخت پر پھل گچھوں کی شکل میں لگتا ہے اور ہر گچھے میں تقریباً تین سے 20 لیچیاں ہوتی ہیں۔ یہ پھل بہت جلد خراب ہو جاتا ہے اس لیے اسے زیادہ دیر تک محفوظ رکھنے کے لیے پتوں اور ٹہنیوں سمیت کاٹا جاتا ہے۔ یہ ہمیشہ تازہ خریدنی چاہیے تاکہ ذائقے کے ساتھ طبی فوائد بھی حاصل کیے جا سکیں۔
لیچی کی غذائیت
لیچی میں کیلشیم، فاسفورس، فولیٹ، کاپر، زنک، پوٹاشیم، سوڈیم اور وٹامن سی، اے، ای کی وافر مقدار پائی جاتی ہے۔ یہ پھل نزلہ، زکام اور انفیکشن کو دور کرنے کے علاوہ پرانے زخموں کو مندمل کرنے میں بھی معاون ثابت ہوتا ہے۔
طبی فوائد
لیچی سے ہمیں یہ فوائد حاصل ہو سکتے ہیں:
گرمی سے نجات
لیچی دل کو طاقت دیتی ہے اور اسے کھاتے ہی طبیعت ہشاش بشاش ہو جاتی ہے۔ گرمیوں کے موسم میں یہ بے چینی اور گھبراہٹ سے بچاتی ہے۔ صرف چند دانے کھانے سے پیاس دور ہو جاتی ہے اور جسم میں ٹھنڈک محسوس ہوتی ہے۔
وزن میں کمی
وزن کم کرنے کے خواہش مند افراد (متوازن غذا اور جسمانی سرگرمیوں کے ساتھ) یہ پھل استعمال کر سکتے ہیں۔ اس میں کیلوریز بہت کم ہوتی ہیں لہٰذا وزن میں بتدریج کمی آتی ہے اور چہرے کی رنگت بھی ماند نہیں پڑتی۔
صحت مند مسوڑھے
مسوڑھوں سے خون بہنے اور دانت کمزور ہونے کی صورت میں تین سے چار دانے لیچی کھانا فائدہ مند ہو سکتا ہے۔ یہ تکلیف کم کرتے ہیں۔ لیچی کھانے کے بعد کچھ دیر تک کلی نہ کریں تاکہ اس کا رس مسوڑھوں پر لگا رہے۔ یہ رس قدرتی طور پر دانتوں اور مسوڑھوں کو صاف کرتا ہے اور ان کی طاقت بحال کرنے میں بھی معاون ثابت ہوتا ہے۔
مضبوط ہڈیاں
لیچی آئرن، میگنیشیم، کاپر، فاسفورس اور مختلف قسم کی معدنیات سے مالامال ہے۔ یہ ہڈیوں کو مضبوط بنانے اور ان میں کیلشیم کو جذب کرنے میں مددگار ثابت ہوتی ہے۔
خون بڑھائے
یہ پھل ہیموگلوبن کی مقدار بڑھانے میں اہم کردار ادا کرتا ہے۔ یہ انیمیا کے مریضوں کے لیے کسی جادووئی پھل سے کم نہیں۔
روشن آنکھیں
لیچی وٹامن اے اور سی سے مالامال ہے۔ اس کی بدولت یہ سخت گرمی میں بھی ہماری آنکھوں کو روشن اور پرکشش رکھتی ہے۔ اس کے علاوہ اس میں موجود اینٹی آکسیڈینٹس اور فوٹو کیمیکلز موتیے کو کنٹرول کرنے میں مدد دیتے ہیں۔
پرکشش چہرہ
لیچی میں شامل وٹامن سی، ای چہرے کو تروتازہ، چمک دار اور داغ دھبوں سے پاک کرتا ہے۔ گرمیوں میں تروتازہ اور جھریوں سے پاک چہرے کے لیے 3 سے 4 عدد لیچیاں لیں اور ان میں ایک کیلا شامل کریں۔ اب اسے پیسٹ کی شکل دیں اور 15 منٹ تک چہرے پر لگانے کے بعد ٹھنڈے پانی سے منہ دھو لیں۔
حمل کے آخری ایام
حمل کے آخری دنوں میں اکثر خواتین بہت بے چینی محسوس کرتی ہیں۔ اس عرصے کے دوران اگر وہ لیچی استعمال کریں تو انہیں بہت فائدہ ہو گا اور وہ اس مرحلے کو باآسانی گزار سکیں گی۔
صحت مند بال
بالوں کو صحت مند رکھنے اور انہیں گرنے سے بچانے کے لیے تین سے چار عدد لیچیوں میں کھانے کے دو چمچ ایلویرا کا گودا ملا کر ماسک بنا لیں۔ اسے بالوں پر لگا کر تقریباً 40 منٹ کے بعد سر دھو لیں۔ آپ کے بال مضبوط اور چمکدار ہو جائیں گے۔
لیچی اور چند احتیاطی تدابیر
لیچی سے بھرپور فائدہ اٹھانے کے لیے ان احتیاطی تدابیر پر عمل کریں:
٭ کچی اور کھٹی لیچی خریدنے سے اجتناب کریں۔
٭ لیچی کھانے سے بلغم زیادہ ہو سکتا ہے۔ دمے کے مریض اپنے معالج کے مشورے کے بغیر اسے استعمال نہ کریں۔
٭ لیچی کھانے کے بعد پانی ہرگز نہ پیئیں۔
٭ لیچی میں شوگر کی مقدار زیادہ ہوتی ہے۔ ذیابیطس کے مریض اسے کم کھائیں۔
