10 ہزار قدم چلنا بھی 10 گھنٹے بیٹھنے کا متبادل نہیں

ماہرین کے مطابق دفتر یا گھر سے کام کرنے والے افراد کے لیے مسلسل بیٹھنا صحت کے لیے سنگین خطرہ ہے۔ روزانہ 10 ہزار قدم چلنا طویل بیٹھنے کے نقصانات ختم نہیں کر سکتا۔ یہ بات ویسکیولر سرجن اور ویریکوز وین کے ماہر ڈاکٹر کپادیا نے ایک سوشل میڈیا پیغام میں بتائی۔

ویسکولر سرجن کے مطابق طویل بیٹھنے سے وریدوں کے والوز کمزور ہو جاتے ہیں۔ اس کی وجہ سے سوجن، رگوں کے پھولنے اور خون جمنے کا خطرہ بڑھ جاتا ہے۔ شام میں 10 ہزار قدم چلنا بھی طویل بیٹھنے کے منفی اثرات نہیں مٹا سکتا۔

ان کا کہنا ہے کہ خون کی روانی کے لیے مستقل حرکت ضروری ہے۔ ہر 45 سے 60 منٹ بعد کھڑے ہونا اور ہلکی سٹریچنگ اس میں مددگار ثابت ہوتی ہے۔ چھوٹے چھوٹے وقفے بھی بڑا فرق ڈال سکتے ہیں۔ اس لیے روزانہ کی چہل قدمی کے ساتھ وقفے وقفے سے حرکت کو بھی معمول بنانا ضروری ہے۔