کچن، باتھ روم اور کمروں کی دیوراروں پر رینگتی چھپکلی بعض افراد بالخصوص خواتین کو خوفزدہ کر دیتی ہے۔ عمومی تاثر کے برعکس گھروں میں پائی جانے والی چھپکلیاں زہریلی نہیں ہوتیں۔ تاہم یہ مختلف قسم کے کیڑے مکوڑے کھاتی ہیں لہٰذا انہیں چھونے کے بعد ہاتھ نہ دھوئے جائیں یا ان کی چھوئی ہوئی اشیائے خورونوش استعمال کی جائیں تو ڈائریا، بخار یا پیٹ میں مڑور ہو سکتی ہے۔
دلچسپ حقائق
٭ چھپکلیاں انٹارکٹیکا کے علاوہ پوری دنیا میں موجود ہیں۔ ان کی کچھ قسمیں صرف پتے، کچھ گوشت جبکہ بعض دونوں چیزیں کھاتی ہیں۔
٭ عموماً ان کی ایک لمبی دم اور چار ٹانگیں ہوتی ہیں جن کی مدد سے یہ رینگتی ہیں۔ تاہم ان کی سانپ نما قسم کی ٹانگیں نہیں ہوتیں۔
٭ آنکھوں پرموجود پپوٹوں کا کام آنکھوں کو صاف کرنا اور ان کی حفاظت کرنا ہے۔ گیکونامی چھپکلی کے پپوٹے نہیں ہوتے۔یہ اپنی زبان سے آنکھوں کو صاف کرتی ہے۔
٭ تمام جانداروں کی طرح انہیں بھی زندہ رہنے کے لیے پانی کی ضرورت ہوتی ہے۔ تاہم صحرا میں پائی جانے والی چھپکلیاں پانی پیتی نہیں بلکہ اسے جلد میں جذب کر کے اپنی پانی کی ضرورت کو پورا کرتی ہیں۔
٭ گھروں میں پائی جانے والی چھپکلیاں انسانوں کو کاٹ بھی لیں تو تکلیف ہوتی ہے مگر جان نہیں جاتی۔ اس کے برعکس سائز کے لحاظ سے چھپکلیوں کی سب سے بڑی قسم یعنی کوموڈو ڈریگن اس قدر زہریلی ہے کہ اس کے ایک مرتبہ کاٹنے سے ہی انسان کی جان جا سکتی ہے۔ یہ قسم انڈونیشیا کے جزیروں میں پائی جاتی ہے۔
٭ان کے پاؤں پر چھوٹے چھوٹے بال ہوتے ہیں جو خاص قسم کی طاقت پیدا کر کے انہیں دیوار وغیرہ سے چپکے رہنے میں مدد دیتے ہیں۔
٭ چھپکلیوں کے سر پر ایک تیسری آنکھ بھی ہوتی ہے۔ یہ دن، رات اور موسم میں تبدیلیوں سے متعلق معلومات اکٹھی کرتی ہے۔
٭ ان کے سر کے قریب موجود سوراخ دراصل ان کے کان ہوتے ہیں جن کے ذریعے یہ مختلف آوازیں سنتی ہیں۔ ان کی سننے کی صلاحیت سانپ کے مقابلے میں کچھ بہتر ہوتی ہے۔
٭ چھپکلی کی ایک قسم بیزی لِسک اپنے پاؤں کی مخصوص ساخت کے باعث پانی کے اوپر تقریباً پانچ میٹر تک چل سکتی ہے۔
دفاعی نظام
٭ ان کے جسم میں چھوٹی چھوٹی ہڈیاں ہوتی ہیں جو پیچھے دم تک جاتی ہیں۔ دم میں کچھ ایسے پوائنٹس ہوتے ہیں جہاں ہڈیاں مکمل طور پر آپس میں جڑی نہیں ہوتیں۔ یہی وجہ ہے کہ جب دم پر ہلکی سی ضرب لگتی ہے تو وہ جسم سے الگ ہو جاتی ہے۔ ان کی بعض قسمیں اپنے تحفظ کے لیے خود ہی دم کو جسم سے علیحدہ کر دیتی ہیں تاکہ شکاریوں کا دھیان بٹے اور وہ بھاگ سکیں۔
٭ جنوبی امریکہ میں پائی جانے والی چھپکلیوں کی قسم (horned lizards) خطرے میں اپنی آنکھوں سے خون نکالتی ہے۔
