میڈیکل ایجوکیشن کے نگران ادارے پی ایم ڈی سی نے ایم بی بی ایس اور بی ڈی ایس طلبہ کے لیے پاسنگ معیار میں اضافے کا فیصلہ واپس لے لیا ہے۔ ادارے نے قبل ازیں پاسنگ پرسنٹیج 50 فیصد سے بڑھا کر 65 فیصد کرنے کی منظوری دی تھی۔ تازہ نوٹیفکیشن کے مطابق کونسل نے پرانا معیار بحال کر دیا ہے۔ یہ فیصلہ موجودہ تعلیمی سیشن 2024-25 پر لاگو ہوگا۔
پی ایم ڈی سی نے حاضری کی لازمی شرح بھی 85 فیصد سے کم کر کے 75 فیصد مقرر کر دی ہے۔ تمام میڈیکل اور ڈینٹل کالجز کو نئے ضوابط پر فوری عمل درآمد کی ہدایت جاری کر دی گئی ہے۔
کونسل کے مطابق نئے قواعد ماضی پر لاگو نہیں ہوں گے۔ ان کے لیے وہی شرائط برقرار رہیں گی جو داخلے کے وقت نافذ تھیں۔ مستقبل میں بتدریج پانچ فیصد اضافے کی تجویز بھی زیر غور ہے۔ تاہم اس پر حتمی فیصلہ ماہرینِ تعلیم اور یونیورسٹیوں سے مشاورت کے بعد کیا جائے گا۔
