گزشتہ برس نگہداشت صحت میں نمایاں بہتری، اقتصادی سروے

قومی اقتصادی سروے کے مطابق گزشتہ برس نگہداشت صحت میں نمایاں بہتری آئی ہے۔ مالی سال 2024-25 کے دوران متوقع عمر اور ویکسینیشن کی شرح بڑھی۔ بیماریوں پر قابو پانے کی کوششوں میں بھی پیش رفت ہوئی ہے۔

رپورٹ کے مطابق، 2015 میں پیدائش کے وقت اوسط متوقع عمر 65.6 سال تھی۔ 2023 میں یہ بڑھ کر 67.6 سال ہو گئی۔ 2015 میں ڈفتھیریا، تشنج اور خناق  کی ویکسینیشن کا تناسب 72 فیصد تھا۔ 2023 میں یہ بڑھ کر 86 فیصد ہو گیا۔ حفاظتی ٹیکہ جات کا پروگرام ہر سال تقریباً 68 لاکھ بچوں کو 12 بیماریوں سے تحفظ فراہم کر رہا ہے۔

ہیپاٹائٹس سی کے خاتمے کے لیے وزیراعظم کا قومی پروگرام (2024–27) بھی شروع کیا گیا۔ اس کا ہدف 12 سال اور اس سے زائد عمر کے 50 فیصد افراد کی سکریننگ، تشخیص اور علاج ہے۔ پروگرام کے تحت عالمی ادارۂ صحت سے منظور شدہ تشخیصی کٹس اور ادویات مفت فراہم کی جا رہی ہیں۔ ذیابیطس کے لیے بھی قومی سطح پر ایک نیا پروگرام متعارف کرایا گیا ہے۔ یہ بنیادی مراکز صحت کے ذریعے تشخیص اور علاج کی سہولیات فراہم کرے گا۔

ملک میں ملیریا سے بچاؤ کے اقدامات کو بھی وسعت دی گئی ہے۔ اس کے تحت انٹرنیشنل فنڈ کے تعاون سے 80 اضلاع میں خدمات فراہم کی جا رہی ہیں۔ ایک ہزار طبی مراکز کا اضافہ ہوا جس سے ان کی مجموعی تعداد 5,500 سے تجاوز کر گئی ہے۔ ٹی بی کے علاج کے لیے 1,929 مراکز اور 12,512 جی پی کلینک فعال ہیں۔ ان سے 2 لاکھ 52 ہزار مریضوں کو مفت علاج فراہم کیا گیا۔