جناح میڈیکل اینڈ ڈینٹل کالج (جے ایم ڈی سی) نے کراچی کے دی سٹی سکول، بیت المکرم کیمپس میں ایک آگاہی سیشن منعقد کیا۔ سیشن کا مقصد بچوں میں دانتوں کی صحت اور صفائی کی عادات کو بہتر بنانا تھا۔
سیشن کی قیادت اسسٹنٹ پروفیسر اور ہیڈ آف ڈیپارٹمنٹ ڈاکٹر محمد محسن حیدر نے کی۔ ان کی ٹیم میں ڈاکٹر عریش سہیل، ڈاکٹر عثمان بخاری، ہاؤس آفیسرز اور معاون عملہ شامل تھے۔
ٹیم نے پری پرائمری اور پرائمری کے تقریباً 180 بچوں کا معائنہ کیا، جن کی عمریں 5 سے 12 سال کے درمیان تھیں۔ ہاؤس آفیسرز نے کلاس رومز میں معائنے کیے تاکہ بچے آرام دہ ماحول میں چیک اپ کروا سکیں۔
سیشن میں بچوں کو برش کرنے کی درست تکنیک کی عملی تربیت دی گئی۔ اس سے بچے دانت صاف کرنے کے زاویے، حرکت اور دورانیہ بہتر طور پر سمجھ سکے۔ سکول انتظامیہ نے دانتوں کی صحت سے متعلق آگہی سیشن کو اہم اور قابل تقلید عمل قرار دیا۔
