ماہرین کے مطابق پاکستان میں ہر سال تقریباً 10 ہزار بچوں میں کینسر کی تشخیص ہوتی ہے، تاہم 30 فیصد ہی زندہ رہ پاتے ہیں۔ دیر سے تشخیص، محدود سہولیات اور مالی مسائل اس کی بڑی وجوہات ہیں۔ ان خیالات کا اظہار انڈس ہسپتال اینڈ ہیلتھ نیٹ ورک کراچی کے زیرِاہتمام ایک سیشن میں کیا گیا۔
ایکسپریس ٹریبیون کے مطابق ماہرین نے بتایا کہ دنیا بھر میں سالانہ چار لاکھ بچے کینسر میں مبتلا ہوتے ہیں۔ ان میں سے 80 فیصد کیسز کم اور متوسط آمدنی والے ممالک میں رپورٹ ہوتے ہیں۔
ڈاکٹر نعیم جبار کنسلٹنٹ پیڈیاٹرک ہیماٹولوجی و آنکولوجی ہیں۔ انہوں نے کہا کہ کینسر کے شکار بچوں میں کم شرح بقا کی وجوہات میں علامات کی دیر سے تشخیص نمایاں ہے۔ ماہرین کی کمی، ناکافی سہولیات اور علاج ادھورا چھوڑنے کے واقعات بھی اہم مسئلہ ہیں۔ بچوں میں لیوکیمیا، لمفوما، دماغی اور ہڈیوں کے ٹیومر زیادہ عام ہیں۔
ماہرین کے مطابق اس مسئلے سے نپٹنے میں آگاہی سب سے مؤثر ہتھیار ہے۔ انہوں نے والدین، اساتذہ اور میڈیا سے اس ضمن میں اپنا کردار ادا کرنے کی اپیل کی۔
