خیبر پختونخوا کے دارالحکومت پشاور میں پانچ ماہ کی بچی میں منکی پاکس سامنے آیا ہے۔ محکمہ صحت کے حکام نے بچی میں انفیکشن کی تصدیق کر دی ہے۔ بچی قطر سے والدین کے ہمراہ پشاور ایئرپورٹ پہنچی تھی۔ احتیاطی تدابیر کے طور پر اس کے والدین کے ٹیسٹ بھی کیے جا رہے ہیں۔
ایم پاکس یا منکی پاکس کی علامات میں فلو جیسا بخار اور پیپ بھرے دانے شامل ہیں۔ بچے، حاملہ خواتین اور کمزور مدافعتی نظام والے افراد زیادہ خطرے میں ہیں۔
پشاور میں پانچ ماہ کی بچی میں سامنے آنے والا کیس اس سال کا دوسرا کیس ہے۔ اس سے قبل پشاور ایئرپورٹ پر ایک 35 سالہ شخص میں بھی اس کی تصدیق ہوئی تھی۔
پاکستان میں اس کا پہلا کیس اگست 2024 میں رپورٹ ہوا۔ اس کے بعد ایئرپورٹس اور سرحدی داخلی راستوں پر سکریننگ کا عمل سخت کر دیا گیا تھا۔ پچھلے سال ملک میں کم از کم آٹھ کیسز رپورٹ ہوئے۔ تاہم، وائرس کی نئی قسم "کلاڈ I ” پاکستان میں اب تک سامنے نہیں آئی۔ عالمی ادارہ صحت نے اگست 2024 میں وائرس کی نئی قسم کے باعث عالمی ہیلتھ ایمرجنسی نافذ کی تھی۔
