ملک بھر میں 3 لاکھ سے زائد افراد کورنیا کی پیوندکاری کے منتظر ہیں۔ اس کے لیے زیادہ تر عطیات بیرون ملک، خصوصاً سری لنکا سے آتے ہیں۔ عالمی سطح پر کورنیا کی طلب و رسد کی صورتحال غیر تسلی بخش ہے۔ اس لیے مقامی سطح پر کورنیا کے عطیات کے لیے سرکاری سرپرستی میں مہم وقت کی اہم ضرورت ہے۔ ان خیالات کا اظہار الشفاء آئی ٹرسٹ کے صدر رحمت خان نے میڈیا سے گفتگو میں کیا۔
انہوں نے کہا کہ کورنیا کے عطیات کے لیے جامع آگاہی مہم کی ضرورت ہے۔ اس میں مقامی لوگوں کو ترغیب دی جائے کہ وہ کورنیا عطیہ کریں۔ یہ ان کی طرف سے اعلیٰ ترین صدقہ ہو گا۔ یہ مہم ضرورت مند افراد کو نہ صرف بینائی بلکہ نئی زندگی بھی دے گی۔
پاکستان میں کورنیا کے عطیات کم ہونے کی بہت سی وجوہات ہیں۔ ان میں آگاہی کی کمی، عطیہ دینے میں ہچکچاہٹ اور سماجی مسائل نمایاں ہیں۔ کچھ علاقائی اور انتظامی عوامل بھی اس میں اہم ہیں۔ ان میں سرجنز اور سرجری کی سہولیات کی کم دستیابی نمایاں ہیں۔
