سپین میں کی گئی ایک حالیہ تحقیق کے مطابق عام استعمال کے ٹی بیگ گرم پانی میں ڈالنے پر اربوں مائیکرو اور نینو پلاسٹک ذرات خارج کرتے ہیں۔ یہ ذرات انسانی صحت کے لیے خطرہ بن سکتے ہیں۔ تحقیق آٹونومس یونیورسٹی آف بارسلونا کے سائنسدانوں نے کی، جو بین الاقوامی جرنل کیموسفئیر میں شائع ہوئی۔
ماہرین نے پولی پروپائلین، سیلولوز اور نائلون-6 سے بنے تین اقسام کے ٹی بیگز کا تجزیہ کیا۔ نتائج کے مطابق پولی پروپائلین والے ٹی بیگ فی ملی لیٹر 1.2 ارب ذرات خارج کرتے ہیں۔ سیلولوز والے 13 کروڑ 50 لاکھ اور نائلون-6 والے تقریباً 82 لاکھ ذرات خارج کرتے ہیں۔ ماہرین نے خبردار کیا کہ مائیکروپلاسٹک آلودگی ماحول اور انسانی صحت دونوں کے لیے نقصان دہ ہے۔
سائنسدانوں نے فوڈ پیکجنگ میں پلاسٹک کے استعمال پر سخت نگرانی پر زور دیا۔ ماہرین کے مطابق بائیو ڈیگریڈیبل ٹی بیگ یا کھلی چائے کے استعمال سے ان نقصانات سے بچا جا سکتا ہے۔
