اکثر لوگ صبح مقررہ وقت پر اٹھنے کیلئے الارم لگاتے ہیں۔ ان میں سے کچھ لوگوں کی آنکھ مقررہ وقت سے چند منٹ پہلے خود بخود کھل جاتی ہے۔ ماہرین کے مطابق یہ محض اتفاق نہیں بلکہ جسم کی اندرونی گھڑی یا سرکیڈین ردھم کا قدرتی عمل ہے۔ یہ نظام نیند، بیداری، جسمانی درجہ حرارت اور بھوک کو مینج کرتا ہے۔
جسم کا سرکیڈین ردھم 24 گھنٹے کی بنیاد پر کام کرتا ہے۔ باقاعدہ سونے اور جاگنے کی روٹین اسے وقت کا درست اندازہ سکھاتی ہے۔ صبح کے وقت کورٹیسول ہارمون میں اضافہ جسم کو دن کے لیے توانائی فراہم کرتا ہے۔ اس وقت نیند کا ہارمون میلاٹونن کم ہو جاتا ہے، جس سے جسم بیداری کی تیاری کرتا ہے۔
جو لوگ روزانہ ایک ہی وقت پر جاگتے ہیں، ان کی جسمانی گھڑی بہتر کام کرتی ہے۔ ایسے لوگ الارم بجنے سے پہلے قدرتی طور پر بیدار ہو جاتے ہیں۔ تاہم سستی یا تھکاوٹ محسوس ہونا نیند کے معیار میں کمی کی علامت ہو سکتی ہے۔ ماہرین مشورہ دیتے ہیں کہ سونے جاگنے کا باقاعدہ شیڈول اختیار کیا جائے۔ صبح قدرتی روشنی میں وقت گزارا جائے، اور سونے سے قبل سکرین کے استعمال سے گریز کیا جائے۔
