سائنس دانوں کے مطابق ہائیڈروجن گیس آنتوں کی صحت اور نظام انہضام کے لیے نہایت اہم ہے۔ یہ گیس آنتوں میں موجود بیکٹیریا کے توازن کو برقرار رکھنے میں مدد دیتی ہے۔ تحقیق موناش یونیورسٹی اور ہڈسن انسٹیٹیوٹ آف میڈیکل ریسرچ کے ماہرین نے کی جو نیچر مائیکرو بیالوجی میں شائع ہوئی۔
ماہرین کے مطابق آنتوں میں موجود بیکٹیریا غیر ہضم شدہ کاربوہائڈریٹس کے تخمیر سے ہائیڈروجن پیدا کرتے ہیں۔ اگرچہ کچھ گیس خارج ہو جاتی ہے، مگر اس کی بڑی مقدار دوسرے بیکٹیریا دوبارہ استعمال کرلیتے ہیں۔ اس سے ہاضمے کا عمل بہتر ہوتا ہے۔ یہ دریافت مستقبل میں آنتوں کے امراض کے بہتر علاج کی راہ ہموار کر سکتی ہے۔
ماہرین کا کہنا ہے کہ ایک عام فرد روزانہ تقریباً ایک لیٹر گیس خارج کرتا ہے جس میں سے نصف حصہ ہائیڈروجن پر مشتمل ہوتا ہے۔ ان کے مطابق اگرچہ یہ گیس مفید ہے تاہم اس کی غیر معمولی مقدار کسی انفیکشن، ہاضمے کی خرابی یا سرطان کا اشارہ بھی ہو سکتی ہے۔
