شفا انٹرنیشنل میں یومِ آزادی کی مناسبت سے ایک پروقار تقریب منعقد کی گئی۔ اس میں ہسپتال کے عملے اور مریضوں کی بڑی تعداد شریک ہوئی۔ تقریب کے مہمان خصوصی نیشنل سائبر کرائم ایجنسی کے ڈائریکٹر جنرل وقار الدین سید تھے۔
مہمان خصوصی نے مریضوں کو جدید اور معیاری طبی سہولیات کی فراہمی میں شفا انٹرنیشنل کے کردار کو سراہا۔ انہوں نے صحت کے شعبے میں مستند معلومات کی اہمیت پر زور دیا۔ انہوں نے ڈیجیٹل دور میں سائبر سیکیورٹی اور قومی سلامتی کے موضوع پر بھی روشنی ڈالی۔
وقار الدین سید نے خبردار کیا کہ فیک نیوز اور غلط معلومات قومی مفاد کے لیے سنگین خطرہ ہیں۔ انہوں نے کہا کہ آن لائن مواد شیئر کرنے سے قبل حقائق کی تصدیق ضروری ہے۔ انہوں نے مزید کہا کہ جس طرح ہمارے بزرگوں نے پاکستان کی آزادی کے لیے قربانیاں دی تھیں، آج ہمارا بھی فرض ہے کہ اپنی ڈیجیٹل خودمختاری کا تحفظ کریں۔ انہوں نے انتشار پھیلانے والوں سے محتاط رہنے کا مشورہ دیا۔
شفا انٹرنیشنل کے چیف ایگزیکٹو آفیسر، ڈاکٹر ذیشان بن اشتیاق نے بھی تقریب سے خطاب کیا۔ انہوں نے کہا کہ امن کا زمانہ ہو، بحران کی صورت حال ہو یا ہنگامی حالات، شفا انٹرنیشنل کے ہیلتھ کیئر ہیروز ہمیشہ قوم کی خدمت کے لیے تیار رہتے ہیں۔ انہوں نے کہا کہ اس سال یومِ آزادی مناتے ہوئے ہم ”معرکہ حق” اور ”آپریشن بنیان مرصوص” میں دکھائے گئے حوصلے اور اتحاد کی یاد بھی تازہ کر رہے ہیں۔ ان آپریشنز نے ثابت کیا کہ پاکستان ناقابلِ شکست ہے۔
آخر میں شفا انٹرنیشنل کے عملے نے عہد کیا کہ وہ ہمدردی، دیانتداری اور قومی ذمہ داری کے ساتھ بہترین طبی خدمات فراہم کرنے کے مشن کو جاری رکھیں گے۔ شفا انٹرنیشنل میں یومِ آزادی کی پروقار تقریب حب الوطنی پر مبنی نعروں کے ساتھ اختتام پذیر ہوئی۔
