ملک میں وفاقی سرکاری ملازمین کے لیے ہیلتھ انشورنس سکیم متعارف کرانے کی تجویز زیر غور ہے۔ یہ بات وزیر مملکت برائے صحت مختار احمد ملک نے قومی اسمبلی کے اجلاس میں بتائی۔ ان کے مطابق سکیم کے تحت سہولیات کا تعین کرنے کے لیے سٹڈیز جاری ہیں۔ سکیم کی سمری وزارت خزانہ کے ذریعے وزیر اعظم آفس کو بھیج دی گئی ہے۔
تفصیلات کے مطابق سرکاری ملازمین کے لیے ہیلتھ انشورنس کی مجوزہ سکیم صحت سہولت پروگرام سے الگ ہو گی۔ اس کا مقصد ملازمین کو سرکاری اور نجی ہسپتالوں میں داخلے اور علاج کی سہولت فراہم کرنا ہے۔ تجویز کا ایک اہم پہلو سرکاری ملازمین اور ان کے زیر کفالت افراد کے لیے بغیر نقد ادائیگی (کیش لیس) طبی علاج کی فراہمی ہے۔ اس کے علاوہ ہیلتھ انشورنس کارڈ بھی جاری کیے جائیں گے۔
معاملہ ابھی زیر غور ہے اور اس کا انحصار مجاز اتھارٹی کی منظوری پر ہے۔ اگر سکیم منظور ہو جاتی ہے تو یہ وفاقی سرکاری ملازمین کے لیے ایک بڑی سہولت ہو گی۔
