صدرِ مملکت آصف علی زرداری نے کہا ہے کہ ذہنی آسودگی معاشرتی ترقی کی بنیاد ہے۔ عالمی یومِ ذہنی صحت کے موقع پر اپنے پیغام میں انہوں نے کہا کہ ذہنی صحت ایک قومی ترجیح ہے۔ انہوں نے زور دیا کہ معاشرے کے تمام طبقات نفسیاتی بیماریوں سے جڑے تعصبات کے خاتمے کے لیے متحد ہوں۔
صدرِ مملکت نے کہا کہ خاندانوں، تعلیمی اداروں اور کمیونٹیز میں نفسیاتی امراض پر مکالمے کو عام کیا جائے۔ ان کے مطابق، کھلا مکالمہ معاشرتی فہم اور ہم آہنگی بڑھانے کے لیے ضروری ہے۔ انہوں نے کہا کہ یہ رویہ معاشرے میں برداشت اور ہمدردی کو فروغ دیتا ہے۔
انہوں نے بتایا کہ وفاقی حکومت نفسیاتی امراض کو پبلک ہیلتھ سسٹم میں مؤثر طور پر شامل کر رہی ہے۔ بنیادی طبی مراکز اور ٹیلی مینٹل ہیلتھ پلیٹ فارمز کے ذریعے علاج اور راہنمائی کی سہولتیں فراہم کی جا رہی ہیں۔ آگاہی مہمات کے ذریعے ذہنی صحت سے متعلق تعصبات اور غلط فہمیوں کے خاتمے پر بھی کام جاری ہے۔
