خیبر پختونخوا حکومت نے سرکاری اداروں میں لیب ٹیسٹ اور ایکس رے کی قیمتیں کم کر دی ہیں۔ تفصیلات کے مطابق محکمہ صحت نے 63 عام ٹیسٹوں کی نئی قیمتیں مقرر کی ہیں۔ بعض ٹیسٹ جو اس سے قبل 150 سے 200 روپے میں ہوتے تھے، اب 50 روپے میں کیے جائیں گے۔ عام ایکس رے کی قیمتیں 150 سے 250 روپے مقرر کی گئی ہیں۔ اس سے قبل مریضوں کو اس کیلئے 400 روپے ادا کرنا پڑتے تھے۔
صوبائی کابینہ نے ریٹ فکسنگ کمیٹی قائم کی ہے جو وقتاً فوقتاً نرخوں کا جائزہ لے گی۔ دوسری طرف پیتھولوجسٹس نے اس فیصلے پر تحفظات کا بھی اظہار کیا ہے۔ ان کا کہنا ہے کہ طبی اداروں کیلئے ٹیسٹ اور ایکس رے کے نئے نرخوں پر عمل کرنا کافی مشکل ہو گا۔ اس کا سبب یہ ہے کہ درآمدی ری ایجنٹس مہنگے ہیں۔ اگر نرخوں میں کمی کرنا ہے تو حکومت کو اس پر سبسڈی دینا ہوگی۔
